2025-26 ikasturterako izen-ematea zabalik dago, euskal kulturaren transmisioa eta sormena sustatzeko.
Zazpi egitasmo eskuragarri adin-talde ezberdinetara egokituak, kultura garaikidea eskola barruan bizitzeko.
Loraldia Eskolak 2025-26 ikasturteko eskaintza aurkeztu du, eta dagoeneko irekita dago izen-emate epea. Euskal kulturaren transmisioa eta sormena ardatz hartuta, programak aukera paregabea eskaintzen die ikastetxeei kultura garaikidearen esperientzia aberasgarriak bizitzeko.
Sormenezko esperientziak eskola barruan
Loraldia Eskolak euskal kulturaren transmisioan sakontzen du, sormenaren eta esperientzia zuzenaren bidez. Antzerkia, musika, literatura, ikus-entzunezkoak eta arte plastikoak bezalako diziplinen bidez, haur eta gazteek euskal kulturaren aberastasuna ezagutzeko eta parte hartzeko aukera izango dute.
2025-26 ikasturterako, zazpi egitasmo eskaintzen dira, bakoitza adin-talde eta helburu ezberdinei zuzendua:
- Ttipia: arte plastikoen bidezko sormena (5-8 urte).
- Lorekolore: euskal kulturaren aniztasuna haurrei hurbiltzea (6-10 urte).
- Airean: euskal musika garaikidearen transmisioa (8-10 urte).
- 7 Kantu: euskal kantutegiaren bidezko kultura ezagutza (10-14 urte).
- Lore Jokoak: pastoralaren eta antzerkiaren sormena (11-16 urte).
- Kamara Sartu!: ikus-entzunezkoen bidezko esperimentazioa (12-18 urte).
- Loreak Tailerretan: proiektu kolektibo ekintzaileak (12-18 urte).
Hezkuntza eta kultura eskutik helduta
Loraldia Eskolak ikastetxeekin elkarlanean garatzen ditu programak, irakasleei eta ikasleei baliabide pedagogiko eta artistikoak eskainiz. Egitasmo bakoitzak gida pedagogiko propioa dauka, eta sormen prozesuan euskal kulturako profesionalek parte hartzen dute, hezkuntza esperientzia ahalik eta aberasgarriena izan dadin.
Orain arteko datuek erakusten dute Loraldia Eskolak eragin positiboa duela komunitate eskolarrean: 9 ikasturtetan, 29 ikastetxetan, 2.600 ikaslek baino gehiagok eta hainbat kultur sortzailek parte hartu dute. Emaitza, euskaraz sortzen duten ikasleak, kultura esperimentatzen duten haurrak eta transmisioa sustatzen duten eskolak.
Izen-ematea zabalik!
Ikastetxeek dagoeneko 2025-26 ikasturterako izena eman dezakete. Informazio gehiago eta izen-emate orria www.loraldia.eus/eskola webgunean eskuragarri dago.
Loraldia Eskola, euskal kulturaren hazia eskoletan erein.
