EUSKAL KULTURAREN TRANSMISIORAKO SORMEN EGONALDIAK

Duela bi urte hasi ginen gure kulturaren transmisioari ekiten uda giroan. Aste batez gazte talde batek sormen esperientzia ahaztezina bizi izan zuen Lekeition. Aurten hirugarren dzangada egingo dugu transmisioaren itsasoan.

Gazte talde bat osatuko dugu eta ekainaren bukaeran kultur profesionalekin harremanetan eta sorkuntzan aritzeko aukera izango dute. “Sortuz ta sortuz gure aukera, atsedenik hartu gabe”.

Katea ez dadila eten!

Sormen egonaldi hauek egundoko aukera dira gure kultur garaikidean murgiltzeko. Ez dugu esperientziarik eskatzen, deskubritzeko gogoa baino ez. Edozein gaztek har dezake parte. Udako giroan, herri liluragarri batean eta lehen mailako sortzaileen eskutik eskura.

Hitza, gorputza, irudia, soinua, arte eszenikoak eta transmisioa landuko dituzte. Begirada panoramikoa izango da. Gure geroa eraikitzeko baliagarriak diren trebetasunak eskainiko ditugu. Geroa gaur.

Transmisio tailer teoriko praktikoez gain, sormen astea ere antolatu dugu Lekeitioko hainbat espaziotan. Egunero emanaldi bat. Egunero sormena bizitzeko modu bat. Egunero ikuskizun bat ikusteko gonbita arratsaldez: Unai Elorriaga eta Josu Aurrekoetxea, Gari, Anari, Maialen Lujanbio eta Dantzaz.